मराठी कविता
* भरारी उंच भर *
चालत रहा वाटसरू नको फिरवू पाट,
खडतर या रस्त्यातूनी कोण काढील वाट,
ध्येय तुझे जवळ आहे धीर थोडा धर,
मनगटाच्या बळावरी विश्वास जरा कर ||१||
ध्येया कडे जाणारा रस्ता आता धर,
फुलवायचीय बाग तुला कष्ट थोडे कर,
नशिबावर विसंबनं आता गड्या सोड,
कष्टाला ही प्रयत्नांची आसुदे जरा जोड ||२||
दगडावरी घन मारून तुकडा आता कर,
रखरखत्या उन्हामध्ये सावली आता धर,
अडचणींच्या मानगुटावरी पाय जरा ठेव,
तुझ्या ही अंगणी आनंदाची फुटू दे आता पेव ||३||
चालणाऱ्या पायांची गती तू बन,
निरभ्र आकाशातील ध्रुवाचा तू कण,
धगधगत्या मशालीतील ज्योत तू बन
अंधारातील जीवनाचे उजळू दे कण-कण ||४||
सफलतेचे उंच शिखर सर आता कर,
उंचावरून नजर तुझी दीना वरी धर,
मरण्या आधी गड्या तुझी ओंझळ जरा भर,
अन भरलेल्या ओंझळीची धार दीनी धर ||५||
बुरसटलेल्या विचारांना आता तू सोड,
आपुलकीने सर्वांशी नाते आता जोड,
तूझ्या ही कष्टाला येईल आता यश,
'कामयाबी' शब्दाला ही करशील तू वश ||६||
संकटं ही फार आहे टेंशन घेणं सोड,
'अपयश' हा शब्द आता डोक्यातूनी खोड,
कामावरी लक्ष तुझ केंद्रित थोडं कर,
जिंकायचयं आता तुला भरारी उंच भर ||७||
*****
प्रा. जनार्दन लक्ष्मण साबळे.
मो. 9921762185
यह वेबसाइट हिंदी भाषा प्रचार-प्रसार हेतु गठित की गई है| इस वेबसाइट पर आपको हिंदी भाषा से संबंधित लेख मिलेंगे जो अपनी भाषा में लिखें हैं |
ConversionConversion EmoticonEmoticon